DETTI RACOLTI DA JULIAN MATTEIRITRATTU DI PIERRE-ANTOINE FOURNIL
Guida è vice-presidente di a federazione di i guidi-cunferenzeri di Corsica, ammenta Virginie Ferrand-Sereni a situazione di un mistieru culpitu assai da a crisa sanitaria. Trà penseri è prugetti, parla di u turisimu di dumane
Si hè piantatu tuttu da u ghjornu à u lindumane. Frà l’attività in leia incù u turisimu, seranu i guidi cunferenzeri unu di i mistieri i più culpiti da a crisa di u Covid-19. Di pettu à una stagione chì ùn hè ancu à principià, cerca quantunque a federazione di i guidi diplumati di Corsica (FGDC) à fà pruposte innuvante per mantene un’attività è imaginà u turisimu di dumane. Guida è vice presidente di FGDC, ammenta Virginie Ferrand-Sereni a situazione di sta prufessione dannighjata assai. Trà penseri è prugetti d’avvene.
À sente a federazione naziunale di i guidi cunferenzeri, ci serebbenu circa 4 000 guidi in Francia frà i quali 45 % penserebbenu à una ricunversione prufeziunale per via di a crisa. Chì hè a situazione in Corsica ?
Conta a nostra federazione 82 guidi. Ùn si sà propiu u numeru tutale di guidi cunferenzeri attivi nant’à u territoriu, ma serebbemu menu di 150. Avemu fattu un’inchiesta regiunale trà l’ottu è u dodeci d’aprile scorsu è si trova chì, trà altri affari, un quartu di i nostri aderenti serebbenu pronti à abbandunà u so mistieru di guida colpa à una mancanza d’attività è di perspettive.
Sò d’accunsentu tutti l’usservatori per dì chì ùn si hà da assumiglià à nisun’altra a stagione di u 2020. Cumu ci feranu fronte i guidi cunferenzeri ?
Ùn si hà da assumiglià à nisun’altra a stagione di u 2020 postu chì stagione ùn ci ne serà o pocu è micca. Hè sta crisa à tempu sanitaria, ecunomica è suciale, è ci puderiamu aghjustà d’altri aspetti. Circhemu à resiste à l’intoppu cum’è no pudemu per via di unepochi di dispusitivi ch’è n’avemu per avà, ma fin’à quandu ? Participemu à e cellule di crisa, pigliemu i cuntatti d’ogni banda ma ne simu à menu 100 % di a nostra attività dapoi marzu è sò debbule assai e perspettive di a ripresa. Una « stagione bianca », vole dì chì ripiglieremu toccu marzu o aprile di u 2021. Vale à dì da quì à dece mesi ! In sti tempi d’incertezza è di pettu à a clientela di i seniori, puderebbe esse sgradata dinù a stagione di u 2021.
Si puderà cunsiderà ch’ella vene sta crisa à sciaccà un ultimu colpu à sta prufessione digià precaria ?
Di sicuru. Sò titulari i guidi cunferenzeri d’una carta prufeziunale data ci da a prefettura dopu riesciuti l’esami d’una licenza prufeziunale o d’un diploma chì ci cunferisce u gradu di maestria. Malgradu sti studii abbastanza zeppi, hè precaria assai a nostra prufessione. D’una banda, per via di i nostri statuti. Più di 80 % di i nostri aderenti anu un statutu d’auto intraprenditore, travaglie-mu à a ghjurnata o à a meza ghjurnata. Da l’altra banda, ci hè a stagiunalità assai forte. Và d’aprile à ottobre u nostru periudu d’attività. Oghje ghjornu, ùn hà micca a Corsica un’offerta turistica d’invernu, tandu avemu cinque mesi « bianchi ». Si pone di fatti a quistione di a tesureria.
Vi parenu à l’altura di a situazione e misure d’aiutu previste da u guvernu ?
Raprisenta u turisimu circa un quartu di u PIB di a Corsica, è ancu di più s’è no parlemu di l’attività chì ùn hè micca diretta. Per avà, pudemu pretende à u fondu di sulidarità o à l’aiutu suciale di l’Urssaf.
Da sapè chì per u fondu di sulidarità, ùn sò riesciuti à avè lu per u mese di marzu a metà di i nostri aderenti, chì ùn avianu micca sciffru d’affari di marzu di u 2019. Hè capita : di regula principia d’aprile a stagione.
In quantu à u disimpiegu parziale o l’indennità ghjurnatante, riguarda solu una piccula parte di i nostri aderenti. Avà a quistione hè di sapè s’elli anu da cuntinuà issi dispusitivi è, s’ella hè di sì, fin’à quandu ? S’ella hè di nò, puderà agisce a Cullettività di Corsica ? Ùn simu micca i soli culpiti, sò tutti l’attori, tutti i settori in Corsica. Sò storichi l’inghjochi.
Ùn venerà à rimette in causa sta crisa inedita u mudellu turisticu arrimbatu dapoi un pezzu à un turisimu di massa, à discapitu di un’offerta di più « qualitativa » ?
Hè cuntrastatu u turisimu di massa. Si parlava digià di a « turismofubia » in u 2016, in particulare in Spagna. Sti pochi anni, hà cuntribuitu a crescita impur-tante di i flussi turistichi à dà sta maghjina tossica di u turisimu. Ùn anu micca aspettatu l’attori a pandemia di u Covid-19 per imaginà è prupone alternative per via di prudutti turistichi incù un valore aghjustatu forte, à distinazione di i particulari o di gruppi stretti, è per certi, avviendu si ver’di l’offerte duraticce è rispunsevule. Chì serà u turisimu di dumane ? Chì turisimu vuleremu da ch’ellu sia perenne, rispunsevule è rispettuosu ? Ci vulerà à truvà un cunsensu.
« Stu sviluppu turisticu quantitativu, cum’è predatore, ci lascerà pocu patrimoniu da sparte »
Di pettu à e so putenzialità naturale, culturale è patrimuniale, pare ch’ella sia a Corsica una terra prediletta per u « slow turisimu ». Pensate ch’ellu ci puderebbe purtà issu cuntestu à sperimentà un mudellu novu ?
Hè ricca a nostra terra è simu piazzati abbastanza bè per sapè la. Si scrive u « turismo lento » inde a tindenza iniziata in Italia in u 1989. In tantu chè guidi, ci pare d’esse u « slow turisimu » u mudellu u più adattatu à u nostru territoriu, à i nostri paesi è à i nostri cullaburatori, artisgiani, cummercianti, agricultori, osteriaghji, risturatori… Certi trà di noi facenu i prudutti inde stu sensu, ùn hè una nuvità. Ma forse ch’ella puderà cuntribuisce sta crisa à sviluppà di più st’offerta. Intantu, s’ella ùn ci accumpagna micca di più una parte significativa di l’attori per sviluppà u slow turisimu, hà da cuntinuà à pisà u turisimu « alimentariu ».
S’è no cuntinuemu cusì, stu sviluppu turisticu quantitativu, culunizatore di spazii, cum’è predatore, ci lascerà pocu patrimoniu da sparte. Senza parlà di u nostru patrimoniu rurale fussilizatu, in cattivu statu è cumplettamente abbandunatu.
Si parla dapoi un pezzu di un turisimu culturale à l’annu in Corsica. Sicondu voi cumu serà ch’ellu ùn hè diventatu una realità è ci seranu propiu i mezi da mette lu in ballu ?
U cuntestu turisticu d’oghje hè un cuntestu internaziunale incù una cuncurrenza forte nant’à i prezzi. Ùn hè micca identificata a Corsica cum’è una distinazione turistica culturale. Da stu puntu di vista, ci face difettu a nostra maghjina è ci vole à aghjustà ci l’inciampi in leia cù l’isulanità : i trasporti è i prezzi. Sicura ch’ella serà a Corsica una distinazione culturale, ùn ci hè chè da andà à vede i nostri musei o à participà à i festivali culturali numerosi per accorghje si ne. Ma ci vulerebbe à mette e mani in pasta per pusiziunà la cusì di pettu à a clientela. À un altru livellu, ci pare oghje ch’elli sò da sviluppà u turisimu culturale, u slow turisimu è e so variatezze da pudè tuccà un turisimu perenne è capace à resiste in casu ch’ella accadi una crisa nova.
Puderebbe stabilì u prugettu di lege nant’à a prurugazione di u statu d’urgenza sanitaria un piazzamentu in quarantena per e ghjente chì ghjunghjenu in Corsica, ciò chì puderebbe esse vistu cum’è una custretta di pettu à l’attività turistica. V’inchieta sta situazione ?
Di pettu à u cuntestu, a priurità serà di sicuru di prutege i nostri figlioli, i nostri anziani, a nostra famiglia… Capimu ch’ella puderà impastughjà sta lege l’attività è appeghjurà a precarisazione è l’addisperu di parechje ghjente. Hè per quessa ch’è no dumandemu l’aiuti à l’altura di a stagione « bianca » chì affacca.
———————————————————————–
« Avemu datu un abbriu cù u hashtag
#2020SiScopreACorsica »
U sicretariu di Statu à u turisi-mu, Jean-Baptiste Lemoyne, face a scumessa di u « turisi-mu naziunale » da francà si u peghju quist’annu. Vistu ch’ella hà inghjennatu a crisa sanitaria una crisa di i trasporti maritti-mi è aeriani, serà pussibule issu scenariu in Corsica ?
Ùn seranu listesse secondu e regione e cundizione di a ripresa. Raprisenta l’isulanità à tempu un frenu è un vantaghju. Chì guarantie ci seranu per i viaghjadori è a pupulazione lucale ? D’altronde, ùn basteranu à salvà a stagione nè u turisimu lucale nè u turisimu di gradimentu. Ci hè una parte di i guidi chì ùn anu da travaglià. Detta quessa, pò purtà sta situazione una parte di i guidi à ripusiziunà si è da l’altra à incittà e strutture à travaglià di paghju cù i guidi per u sviluppu di prudutti turistichi. Hè quantunque un peccatu ch’elli sianu mubilizati i guidi è e so cumpetenze una parte sola di l’annu.
Certa, riagimu da pudè accres-ce e nostre pruposte ver’di un turisimu culturale addirizzatu à i nostri cuncitadini. Ma senza l’aiuti da parà l’intoppu, è senza l’appoghju di l‘urgani regiunali, ùn puderemu scumbatte tantu.
Conta di mette in ballu a vostra federazione un’uperazione cum’è « st’estate, si visita a Francia » à u livellu naziunale. Cumu si hà da fà è cumu si puderà adattà a vostra offerta à un publicu lucale ?
U 14 d’aprile, avemu lanciatu i hashtag #2020SiScopreACor-
sica è #2020JeVisiteLaCorse cum’è un’ochjata à u hashtag #2020JeVisiteLaFrance à u livellu naziunale incù l’iniziativa di sette associi regiunali di guidi, frà i quali u nostru. Avemu datu un abbriu, chì vene à cumplettà i prugetti chì sò in anda cù, per un dettu, i stabili-menti sculari o a direzzione di u patrimoniu. Dopu, ogni guida o gruppu di guidi hà da ripiglià st’abbriu, secondu e so cumpetenze, u so prufilu… per via di e so rete suciale, incù i so clienti o i pruspetti.
sica è #2020JeVisiteLaCorse cum’è un’ochjata à u hashtag #2020JeVisiteLaFrance à u livellu naziunale incù l’iniziativa di sette associi regiunali di guidi, frà i quali u nostru. Avemu datu un abbriu, chì vene à cumplettà i prugetti chì sò in anda cù, per un dettu, i stabili-menti sculari o a direzzione di u patrimoniu. Dopu, ogni guida o gruppu di guidi hà da ripiglià st’abbriu, secondu e so cumpetenze, u so prufilu… per via di e so rete suciale, incù i so clienti o i pruspetti.
Trattendu si di l’offerte, sò parechje è varie, secondu u publicu, u cuntenutu è a lingua. Cù sta crisa, a ghjente capisce a ricchezza è e putenzialità di u so patrimoniu, di u versu ambientale…
Ci hè a pussibilità di fà ne prufittà ancu a pupulazione chì campa sopra locu. Esiste stu flussu di visitori assai attaccati à u territoriu è chì ricercanu un’identità cullettiva cù una logica di citadinanza rispunsevule.
Di pettu à a demugrafia debbule di l’isula, basterà u mercatu lucale à mantene un’attività per i guidi ?
Di solitu, ci tocca, per una parte maiò di noi, à avè una seconda attività. Tandu, ci pare evidente ch’ellu ùn basterà u mercatu lucale à mantene a nostra attività.
